Jnfqqub

O stemma di Fieschi

Gian Loigi Fiesco (Zena, 1523 - 1547), nobile zeneize aotô da falia conzua contra o Dria Doia.

Biografia[modìfica | modìfica wikitèsto]

O nascette a Zena da Scinibado comes Lavaniae (quondam Gian Luigi senior, rammo de Torriggia e Savignon) e Maia Grossa da Rove (figgia de Bærtomê do rammo zeneize di Grosci da Rove), into 1522.

Primmogenito de œutto figgi legittimi, o l'ebbe in testamento da-o poæ (testamento do 18 zenâ 1528, doppo l'investitua de Carlo V do 2 sett. 1524, renovâ a-o Fiesco o 4 genn. 1535) i feüdi de Montœuggio, Torriggia, Carrega, Garbagna, Roccataggiâ, l'ottava parte de Savignon, Cremonte, Grondoña, San Steva d'Aveto, Borgotâ, Carxi e Veppo, Vaize, Croxe Val Trebbia e parte de Otton. O Fiesco o l'ea erede de 'n patrimonio a l'apexe da so espanscion, ma into mæximo tempo segnao da de difficortæ finançiaie e politiche che fun drammatizzæ da-a morte precoxe do poæ (fin 1531 ò prinçippio 1532).

A-a morte do poæ o Fiesco o l'andò a vive co-a moæ into castello de Montœuggio, donde o l'ebbe comme precettô P. Pansa (za segretaio e amigo do Scinibado, lettiao e aotô de vitte de Innoçençio IV e Adrian V, pappi de caza Fiesca, pubbricæ into 1601), a-o quæ spettò insemme con Dria Doia a tutella ascì. A 18 anni o preize o comando di fœüdi e l'amministraçion do patrimonio. O se transfei a Zena, into palaççio Fiesco de Viovâ, e into zenâ 1543 o maiò Lenoa Çibba, neva de Innoçençio VIII, co-ina dœutta de 34.000 scui d'óo. O maiezzo o fu çelebrao a Carræa e i spozoei fun imbarcæ a Avença e transportæ a Zena co-e galee do Zanetin Doia. Nascette da chì a lezendia da rivalitæ d'amô tra o Fiesco e o Zanetin in sciâ quæ caziâ l'enfaxi de numioxi cronisti da congiua do 1547.

In effetti, tutta a vexenda umaña do Fiesco, e tutta a produçion lettiaia relativa, a se condensa da pœu in gio a-a congiua do 1547. A-e stigge notiççie insci-â vitta fa da contrapeizo una vastiscima lettiatua incentrâ in sce questo evento. A congiua, un tema clascico da lotta politica inte l'Œüropa moderna, co-o peizo che in questa aveiva l'inmaginaio, o sfrutamento politico e a retorica a peto da realtæ di fæti, a colora scin da-a morte in moddo indelebile a figua e l'avventua umaña do Gian Loigi. A retorica da congiua, ch'a Zena a l'aiva un fondamento inti scheamenti façionæ da nobiltæ e inti confliti tra nobili e popolæ, a s'intreçça inta figua do Fiesco co-o tema da fin da so nobile famiggia ("pe occurto giuditio de Dê - scrisse o F. Federighi into so "Tratao da famiggia Fiesca" e con alluxon a-a scomparsa in mâ do mæximo Fiesco sotta o peizo de l'armadua - se ruinò con preçipitio ... pe l'intempiança de Gio. Loigi... o quæ o preçipitò into profondo de l'abisso, tutte e groie di so antepassæ", C. 49r); con quello da rivalitæ e de l'inimixiççia tra zoeni, o colto e raffinao Fiesco e o sgrœuzzo e pin de sosta Zanetin, nevo do Dria Doia e so successô dexignao; infin co-o tema da presonta relaçion sentimentâ tra o Zanetin e a Lenóa Çibba. Son questi elementi clascichi de tragedie renascimentæ che attian a senscibilitæ romantega.

A congiua de fæto a pòrta in luxe pròppio o ròllo de gren famigge che da riforma ean stæte protagoniste, e insemme e struttue d'alliança e o zœugo de façioin ch'apartegnivan a-a consoetudine politica da çittæ: un dæto che fòscia o pœu spiegâ l'enfaxi di cronisti in scê qualitæ di attoî e in sce-e relaçioin interpersonæ. Un processo che, s'è dîto, pœu ese lezuo comme transformaçion de l'élite dirizente zeneize, co l'emarginaçion de famigge "feüdæ" e l'emerze prepotente de un'aliança d'interesci tra i assentisti de galee (o Doia) e i gren banchê-finançê (Adammo Çentrion e i Spiñoi). In sce questo mæximo teren se pœu leze a redoggia politica da vexenda, de seguo dominâ da-a succescion a-o Dria Doia, foscia strumentalizzâ da-e corte de Pariggi e Romma. E prœuve de tramme internaçionæ conscistan inte (vaghe) promisse da corte de França a-i fræ do Fiesco, Ottobon e Cornelio, into prezonto favô de pappa Paolo III, inte l'intervento ciu diretto do ducca de Piaxença Pê Loigi Farneize, da-o quæ o Fiesco o l'aiva accattao quattro galee armæ.

A congiua, preparâ tra a stæ e l'aotunno do 1546, a se risolse squæxi pe intrego inta nœutte tra o 2 e o 3 zenâ 1547. Daprimma programmâ pe o 4 zenâ, doppo o maiezzo tra o cugnao do Fiesco, Giulio Çibbo, e Peeta, sœu de Zanetin Doia, a l'avègne inti giorni da scadença do mandao dogâ de Gian Batista Di Fornæ. O scopo immediao o l'ea d'amaçâ Dria e Zanetin Doia e Adammo Çentrion, braçço drito do Doia, portâ a ra sedia dogâ Bærnabè Adorno e mette Zena sotta a proteçion da França. Inte paole de un di conzuæ, Verriña, protagonista do succescivo processo, o Fiesco "o l'aiva dessegno de riordinâ ra çittæ e redûla a mao egualança de quello ch'a foisse primma"; inte paole d'atri l'enfaxi a l'è in sce "popolo e libertæ" ^[1]. O Fiesco o contava in sce-e forçe di so feüdi apeninnichi ("Perçochè ri Fieschi comandavan a uña gran parte dri montagnin" ^[2]), in sce l'adexon in çittæ di "popolæ", in particolâ tra i artexen tescili, e in scî spaççi oferti da-a rivalitæ tra nobili vegi e nœuvi.

Into depoidisnâ do 2 zenâ o Fiesco o feççe vixita a-o Dria Doia inta so villa de Fasciœu, o l'annonçiò a Zanetin una sciortia notturna co-ina galea, e o costruì coscì a sorpreiza. Inta nœutte tra o 2 e o 3 zenâ, i congiuræ, in parte guidæ da-o Giœumo Fiesco, s'impadronin de porte da çittæ e da darsena de galee: un testimonnio, tâ Angeo Maia do Borgo, o descrisse a-o processo comme "inver ra porta de S.to Andria o ritrovò ro Segnô Girœummo con uña grossa squaddra con un tamburo et ra bandera in ra quâ squaddra se criava popolo e libertæ ..." ^[3]. O Zanetin Doia o fu amaççao e o Dria Doia o se rifugiò, co-i familiæ, a dorso de mû a Mason, feüdo de Adammo Çentrion. Ma inta darsena, o Fiesco o moì preçipitando in mâ. O fræ Giœumo o l'ariescì comunque a impadronîse temporaniamente da çittæ; ma o 3 zenâ o l'açetò l'oferta de 'na tregua da-i delegæ do Senato zeneize (Nichiozo Doia, Paolo Pansa e Ambrœuxo Senarga), ch'o s'ea riunio ascistio da l'ambasciatô spagnollo, Gomez Suarez de Figueroa. In sciâ promissa de perdon e amnistia generâ o Giœumo o s'aretiò co-i so ommi into castello de Montœuggio.

Roiñe do castello di Fieschi de Montœuggio - Magazin Pittorico 1834 - Zena Ponthenier

Rentrao a Zena, o Dria Doia o l'ótègne da-o Senato a revoca do perdon concesso a-i rebelli, o feççe pubbricâ un bando perpetto contra i fræ Fieschi, o misse l'assedio a-i so castelli e o l'ótègne o smembramento de quello ch'o l'ea o so stato appenninico. O palaççio de Viovâ a Zena e o castello de Montœuggio fun asccianæ; o còrpo do Fiesco o fu ripescao, esposto pe doi meixi inta darsena e da pœu portao a-o largo e cacciao in mâ. L'œuvia de spœugiaçion do patrimonio di Fieschi a se compì poco ciu tardi, quande doppo a nœuva congiua de Giulio Çibbo fu confiscao ascì i ben do Scipion Fiesco (unico di fræ sorvevisciuo e rifugiao a-a corte de Pariggi).

A Repubbrica a l'incorpoò coscì Montœuggio, Roccatagiâ, Neion e Vaize. A nœuva geografia politica de l'Appennin a fu in parte ridisegnâ da-o passaggio de Borgotâ e Calestan a-o ducca de Parma e da quello de Pontremmoi, Torriggia, Carrega, Grondoña, San Steva d'Aveto a-o governatô de Milan. A titolo de ressarçimento di danni subii da-e galee e da-i palaççi in çittæ i Doia ótègnan da l'imperatô una parte de questi feüdi. Co-a nœuva riforma, dita "do garibetto", o Dria Doia o l'ariescì a rinsâdâ i ligammi tra i nobili vegi e a potençiâ in senso oligarchico i Seeniscimi Collegi.

Inta lettiatua[modìfica | modìfica wikitèsto]

O megio frûto de quello filon lettiaio ch'o nascette co-i primmi cronisti da congiua a l'è l'œuvia de A. Mascardi, pubbricâ a Milan into 1629. O Mascardi, aotô çellebre pe l'œuvia "Dell'arte istorica" (Romma 1636), o çitta comme fonte Foggetta, Scigonio, Campanaçço e Bonfadio, ma ascì "molte scritue privæ". Inta presentaçion "A-o lettô" o l'ófre una narraçion drammatica, ma ascì "un'aotentica testimoniança de cose passæ", ch'a se concreta inta ricostruçion do sfondo politico zeneize e œüropeo, into quæ o l'individdoa a "caxon vea" de l'avventua do Fiesco. I temi biografichi e psicologichi - l'ambiçion e l'"immatua feroçitæ" do zoeno Fiesco, i "perniçioxi stimoli da natua" e a "pescima educaçion", l'influença di amixi, e lettue (a vitta de Neron, a congiua de Catiliña, o prinçipe do Maciavello) che instillan inte l'animo do Fiesco a crudeltæ e l'"amô do privao interesse sorve ogni raxon humaña" - son riconduti a-o contesto e a de riflescioin generæ insci-â nobiltæ e "l'incredibile danno ch'apporta a-e cose pubbriche a maggiorança di çittadin eminenti, quantunque virtoxi e discreti". O strazordenaio successo de quest'œuvia, ch'a l'ebbe aomanco sei ediçioin seçentesche e da pœu numiose restampe inte l'Œuttoçento, a fissa a fortuña de 'na vexenda e de 'n tema che into Seiçento son ancon çelebræ in ciave politico-lettiaia e co-ina lente maciavelliaña da-o cardenâ de Retz, e son da pœu repigiæ in tutti i generi inte l'Œuttoçento. L'interpretaçion da figua do Fiesco ch'a dommina a lettiatua çinque-seçentesca a l'è inversâ inta sostançia tra Sette e Œuttoçento, quande o l'è rivixitao comme eroe da libertæ da patria (Jean-Jacques Rousseau) e a so impreiza a l'è çelebrâ in tragedie e romançi in ciave romantega, in sce l'esempio de F. Schiller (Die Verschwörung des Fiesco zu Genua, 1783), che inta stoia o l'aiva foscia visto a poscibilitæ de fâ i conti co-o dispotico ducca do Württemberg. Ma l'Œuttoçento o registra ascì a scoverta de fonte storiche. A l'eppoca da "critica storica" (Gavazzo, p. 16) appartegne e recugeite di documenti de Oivê, Bernabè Brea, Belgran, Gavazzo, Staffetti. o Brea (1863) o feççe ricorso a de fonte de l'Archivio de Stato de Zena (Lettie e Instruçioin) pe propoñe un punto de vista critico in scî "idoli" de façioin e rispetto a-o "giudiççio che do Fiesco e do Doia feççan i contemporanei" (pp.VII-VIII). Spiñoa, Belgran e Poistæ pubbricon into 1868 i documenti de l'Archivio de Simancas (relaçioin de l'ambasciao spagnollo a Carlo V e lettie). O Gavazzo o ripubbricò into 1866 questi documenti insemme co-i verbæ di interrogatoi di congiuræ. A pubbricaçion pe œuvia do Staffetti, into 1891, di documenti riguardanti Pontremoli e a corte mediçea a l'ezaorì squæxi completamente e testimonnie in sciâ conzua do G. L. Fiesco.

A seportua do Fiesco (ch'a no l'è mai avvegnua) - Magazin Pittorico 1836 - Zena Ponthenier

1. ↑ Archivio de Stato de Zena, Archivio segretto, 324
2. ↑ Sigonio, II, p. 240
3. ↑ Arch. de Stato de Zena, Archivio segretto, 324